محمد أبوزيد
شهد المجتمع المصري، أمس، حادثة غريبة من نوعها، حيث قتل العاملون بإحدى مقاهي شارع النزهة، بالقاهرة الجديدة، أحد رواد المقهى، بعد مشادة كلامية دارت بينه وبين العاملين بالمقهى، فانتظره عمال المقهى بالخارج، وباغتوه بالضرب والطعنات، ثم هربوا، ووصلت سيارات الشرطة والإسعاف، لنقله إلى المستشفى، ليلفظ أنفاسه الأخيرة هناك.

ويروي قصة مقتل الشاب محمود بيومي، شهود عيان كما شاهدوها:"حدثت الجريمة في مقهى «kief» في شارع النزهة بيبلطجوا عالناس بعد الماتش وقفلوا الباب و قالوا محدش هيخرج الا لما نحاسب كل الناس ،قام شاب معاه خطيبته قال انا عايز احاسب و امشي و شد مع شوية البلطجية دول ،جيه مدير المكان قال حساب الترابيزة دي معايا و هو بيحاسبه حصل مشادة بينه و بين مدير المكان بسبب ان الولد بيقوله اللي بتعملوه ده بلطجة ، قاله مش انت بتعلي صوتك هتشوف البلطجة بجد، ونزلوهم من الباب الخلفي وأول ما خرجوا من الكافيه ضربوه بكرسي على ضهره وطعنوه طعنتين بالماشة بتاعة الشيشة شفتهم بعيني فالمستشفى واحدة فالرئة وواحدة في بطنه فوق السُرّة .. اتنقل الولد لمستشفى فلسطين و منها على كليوبترا ومات فكليوبترا"

وشن رواد موقع التواصل الاجتماعي حملة تطالب بإغلاق المقهى، ومحاسبة المتورطين، وجاءت التعليقات غاضبة، وغير مصدقة لما حدث، فيقول أحد النشطاء "مامفيش حاجه اسمها مقطعه الكافيه ده لازم نزيله خالص، ولو الحكومه مش هتعمل كده، احنا لازم نعمل ومش عوزين كبش فدى وخلاص عوزين المدير وصاحب المكان".. وتابع أخر: " وبعدين بعد اما الشاب مات راح فين البلطجي؟ هرب يعني ولا اتمسك؟ والناس فين؟ يعني انا مش مصدق اللي بيحصل ده؟ هو عادي القتل كده عادي؟".. واضاف ناشط أخر: "طيب هى الناس كانت عاوزه تمشى من غير ما تحاسب ولا ايه !! مش فاهمه ، ايه السبب انهم يعملوا كده !!" بينما علق ناشط قائلاً: "طب فين الناس اللى قاعدة ايه احنا بقينا فى غابة نشوف واحد بيتقتل قدام عيننا و نسكت و الله لو كل الناس اتكتلت على ابن …. اللى مسكين السكين كانوا موتوا ضرب!".. واختتم أخر التعليقات قائلاً: "حسبي لله ونعمه الوكيل.. ولله فعلا ليهم حق يقولو عليا المصري ابو دم رخيص"،

وعلى صعيد أخر، وتحولت تلك القصة إلى قضية رأي عام، حيث ستتناولها جميع البرامج التلفزيونية الليلة.

كما أكد مصدر أمني بمديرية أمن القاهرة، أن المقدم سمير مجدي رئيس مباحث قسم شرطة مصر الجديدة تلقى بلاغًا بوقوع مشاجرة داخل أحد الكافيهات بدائرة القسم، أسفرت عن مقتل طالب. ألقت قوات الشرطة القبض على (ع.م) المدير المسئول عن الكافية، وتمت إحالته إلى النيابة العامة التي قررت حجزه على ذمة التحريات، وتكثف الأجهزة الأمنية جهودها للقبض على مرتكب الواقعة الذي هرب عقب ارتكاب الجريمة وهو شريك رجل اعمال شهير.