داعب رواد موقعى التواصل الاجتماعى "تويتر" و"فيس بوك"، السفير البريطانى فى القاهرة جون كاسن بعد تغريدته المشيدة والمازحة مع الطالب المصرى يوسف أنيس، الذى كرمه مجلس اللوردات البريطانى بعد حصوله على المركز الأول فى مسابقة science award، والذى قال عنه إن "الزهر لعب معاه"، مستعينا بأغنية الفنان الشعبى "أحمد شيبة".

وأكد الرواد أن "كاسن" يكن حبا كبيرا لمصر ودوما يرغب فى محاكاة شعبها فى عاداتهم اليومية وطريقة حديثهم، خاصة جملة "الزهر لعب" التى أعلن المصريون أنها جملة مصرية خالصة.

وقال "رشدى": "أنت من بريطانيا البلد ولا بريطانيا المحطة يا بلدينا؟"، بينما "عبد الخالق" علق قائلا: "السفير البريطانى عرف الزهر خلاص، شوية شوية هينزل ياكل فول بالزيت الحار من على العربية ويشد حجرين قص فى الحسين".

أما "محمد طارق" فقال: "الله، الراجل قعد معانا شوية بقى بيحب الفول وبيسمع أغانى شعبى وبيتفرج على أفلام السبكى، اسم الله علينا شعب ينطق الحجر" وقال جيمى: "السفير ده جامد أقسم بالله، ده بيعزم اللى شغالين فى السفارة على عربيات فول".

بينما قالت "آية جمال": "الزهر لعب؟ دا جون كاسن ولا جون شيبة"، وقالت عبير هادى: "يا ريت الأدمن يبلغ السفير إن دمه زى السكر، وإنه لو كان المندوب السامى البريطانى أيام الاحتلال بيحب مصر ومتفاعل معانا ودمه خفيف كده، ماكانتش قامت ثورة أصلا، ده أنت عارف مصر أكتر من الوزراء، منور مصر يا معلم".

أما "أحمد مرسى"، فقال: "مش مهم الطالب المصرى اتكرم، ده عادى، أنا اللى فاقعنى السفير جاب حكاية الزهر لعب دى منين"، وقال عبد الله: "إنت أحسن سفير اشتغل فى مصر، برافو عليك، عندك تواصل عالى جدا".