حلّت الفنانة صفاء جلال، ضيفة على الإعلامية ياسمين عز ببرنامج "كلام الناس" والمذاع عبر قناة "إم بي سي مصر".

وقالت الفنانة صفاء جلال إن زوجها اشترط عليها عدم تجسيد دور الراقصة مرة أخرى بعد تجسيدها في مسلسل "امرأة من زمن الحب".

وأضافت: "بعد ما عملت دور راقصة في مسلسل امرأة من زمن الحب جوزي قالي مش هتعملي دور رقاصة تاني، وهو قالي إحنا هنكمل تمثيل بس بلاش دور رقاصة تاني خالص فعشان كدا معملتش دور رقاصة، وسمعت كلامه علشان ميزعلش".

قالت الفنانة صفاء جلال: "عملت عملية نحت جسم عشان في فترة كنت تخنت أوي وقابلت دكتور وعملت عملية بس بعدها سيبت نفسي وتخنت تاني فبعديها عملت كبسولة المعدة عشان ما كلش، لأني كان عندي مشكلة في الأكل بالليل".

وأضافت: "عملت كبسولة المعدة كانت لطيفة معايا عشان كنت محتاجة أنزل 10 أو 15 كيلو وفعلا نزلتهم ودلوقت بكمل دايت وبروح الجيم".

وأشارت: "ما أفعله مجهود على أي ست وبالذات اللي عدت 45 لأنها بتبقى عارفة أنها بتبذل مجهود اكتر من بنوتة عندها 20 سنة، والمشكلة مش فيا بس عشان الناس متعودين عليا من أيام الضوء الشارد كنت رفيعة جدا وبحاول على قد ما بقدر اوصل لشكل لطيف والناس تتقبله".

تحدثت الفنانة صفاء جلال، عن عملها مع الزعيم عادل إمام، قائلة: "اشتغلت مع الزعيم عادل إمام في مسلسل صاحب السعادة، وكان جسمي رفيع".

وأضافت: "غبت شويه وبعدين جيت أعمل ضيفة شرف معاه في مسلسل عوالم خفية، وكان جسمي مليان، قال لي تخنتي ليه يا صفاء قلت له الاكتئاب، فقال لي أوعي تزعلي ولا تكتئبي افرحي دائما واضحكي على طول وحبي الدنيا ولا تنظري للجانب السلبي في الحياة، وخليكي مبسوطة عمرك ما هتكبري".