دورت كتير وكتير عشان الاقي جمله تعبر عن احتياج الست من الراجل  متمثل في ايه وصلت للاختصار الجميل ده وعلي الرغم من انهم كلمتين صغيرين الا ان جواهم معاني كتيره وكبيره جدا

المقال ده لاول مره بكتب بالعاميه بس حسيت انه لازم يبقي بالغه بتاعتنا عشان يوصل من القلب للقلب

يعني ايه بقي اشكمها بحنيه الست مننا يارجاله عاوزه الراجل يمشي كلمته عليها يقولها اعملي وماتعمليش .. روحي وماتروحيش .. البسي وماتلبسيش تحس بخوفه عليها في كل خطوة بتعملها واهتمامه بأدق تفاصيلها غيرته عليها من كل نظره تجرحها او تضايقها

ومش معني انك تشكم انك تزعق او تتخانق او تزعل او حتي تكشر انت ممكن بكلمه تمشي الست مننا و بكلمه تقعدها بس في حاله لو عرفت توصل لمفتاحها !!

في رجاله كتير هتقولي واحنا نعرف مفتاحها منين انشاء الله هقولك انا ياسيدي وخدها من اختك نصيحه

مش كلنا مفاتحنا وحده كل باب وليه مفتاحه وكل ست وللوصول لقلبها طريقه

في وحده توصلها بالرومانسيه المستمره مع شويه قلوب وورد احمر .. وحده تانيه توصلها بالمسؤليه واحساسهاا ان معاها راجل وقت ماتقع هتلاقيه جمبها .. وحده تالته توصلها بالاهتمام بكل تفاصيل حياتها باهلها باصحابها بشغلها .. وحده رابعه توصلها بنجاحك وطموحك وتكوينك لنفسك بنفسك ومابين كل وحده والتانيه في الف وحده ووحده وانت وشطرتك تعرف دي دخلتها منين

نرجع بقي لانك تشكمها بحنيه للاسف الرجاله اليومين دول بقوا نوعين اما راجل سايب مراته تعمل الي علي مزاجها ومكبر دماغه عشان مش عاوز صداع يااما راجل مقفل علي مراته بمليون ترباس ومفكر ان بكده هو سي السيد الي حاكم وشاكم البيت بلي فيه

النوع التالت وده موضوعي النهارده وللاسف هما قله لان الرجاله مش فاهمين الستات عاوزه ايه وليه وازاي وهو النوع الي بيشكم بس بحب بحنيه بدلع بطبطه يعرف امتي يقرب وامتي يبعد

انا الي بقلكوا ا هو اشكمها اؤمرها افرض رايك بس مع حبتين دلع مع كلمتين حلوين مع هديه صغيره مع خروجه حلوه هتلاقي الست مش بس خاتم في صباعك لا دي تحت طوعك كمان تقولها كن فيكون

وهقولكم حاجه بس دي في سركم الست مهما عملت انها عشر رجاله في بعض وشخصيتها قوية وناقص شويه ويطلعلها عضلات فهيا ضعيفه جدا جدا جدا ادام الكلمه الحنينه من راجل بتحبه وقتها بس بتتحول من كائن مستأذب لكائن مستأنث عشان تكون ليه زي ما هو عاوز بس هرجع واقول لو عرف يوصل لمفتاحها..

قبل مااختم هقولكم كلمه تحطوها حلقه في ودانكم

الست غريزتها ودنها ااه ماتستغربوش ودنها الكلام الحلو الرومانسيه المعالمه الطيبه صدقوني هيعمل من الفسيخ شربات

يبقي اما تحب تشكمها اشكمها بس بحنيه