بقلم : ابتهال الحلو

على بوابه عمري ساكن شبح الخوف

بيخوفني بنظره وبخاف جدا لما بشوف

سهم عيونه بيقتل فرحي سهمه بيقتل حتى الشوف

ضي عيوني بيقفل فجأه وبلقى الضلمه طريق مكشوف

ولما بتوه ف دواير الضلمه بلقى الخوف اشباح بتطوف

تعبان بيموت افراحي والموت عندي ده شئ مألوف

حتى شعاع النور الخافت اللي بيفرح بيه المكفوف

لما بشوفه خوفي بيزيد بدل ال100ضعف الوف

وألقى العقل بيحسب حسبه وألقى القلب ضعيف ملهوف

عايز يفرح فرحه وتكمل لأجل ما ينزف قلمي حروف

ويكتب على بوابه عمري احنا قتلنا شبح الخوف