قالت الفنانة شيرين عبد الوهاب، إنها شعرت بخوف وهي تغني في حفل الكويت، قائلة: مكنتش فاكرة إن الجمهور بيحبني قوي كده.

وأضافت شيرين خلال مداخلة هاتفية مع الإعلامي عمرو أديب ببرنامج الحكاية، كنت مبسوطة جدا امبارح بعد الحفلة، وصحتي كويسة الحمد لله وبضيع وقتي بين الرياضة، وتابعت: الحفلة اللي كانت في الكويت فوق الخيال.

وعن زيارتها لفضل شاكر، قالت الزيارات ممنوعة بالكويت، وذهبنا لزيارته للاطمئنان عليه، وبعد ذلك طلبتنا إحدى الجهات للسؤال عن سبب الزيارة لأن الزيارات ممنوعة بالكويت.

وتابعت شيرين حديثها قائلة: مكنتش حاسة غير بخوف شديد وقلق ولكن كنت عارفة إن مستنيني جمهور ذواق وبيسمع وجمهوري في الكويت كانوا متعاونين والحفلة كانت حلوة فوق العادة، ومكنتش أعرف إني وحشاهم أوي كده، وزي ما وعدتك آخر مرة إني بحضر لحاجات تسعد الناس والحفلة دي أولهم.

وتابعت: أنا إمبارح كنت بغني من طبقات عمري ما غنيت منها قبل كده وصوتي كان مفتوح أوي، واتبسطت جدًا جمهور الوطن العربي كله واحشني، وأنا الحمد لله كويسة وبشتغل وبضيع الوقت في شغلي والراياضة والبنات وبقى فيه نشاط، والناس كانت جميلة واتبسطت أوي امبارح والحفلة كانت فوق الخيال

شيرين تزور فضل شاكر

وأضافت شيرين: فيه بينا صديق مشترك وأصدقاء مشتركين وبقالنا 10 سنين بنتكلم في التليفون، وفيه صديق اقترح إننا نزوره قولنا يا ريت وسألنا هل ده صح وينفع؟ قالوا ينفع بس لازم تصريح من الدولة وخدنا تصريح وروحنا وكانت سهرة جميلة، وبعدين تاني يوم اتطلبنا سألونا كام سؤال بمنتهى الأدب والموضوع خلص، وكانوا مش حابين الزيارة دي تحصل لأنها ممنوعة وإحنا مكناش نعرف إنها ممنوعة.

واستكملت: وفضل شاكر زي الفل وكانت من أحلى سهرات عمري، وصحته كويسة وبيحضر لحاجات كتير حلوة أوي وهتعجب الناس، وفيه ناس قاعدة تطلع مشاكل بس وأنا مليش علاقة بحاجة ووضحت إمبارح في الحفلة إن بيادة الجيش اللبناني على راسي وبحترمها.