أجرت الإعلامية رشا نبيل، مقدمة برنامج «كلام تاني»، عبر فضائية «دريم»، مساء الخميس، مداخلة هاتفية مع السيدة القبطية، سعاد ثابت، التي تعرضت للاعتداء والتعرية، بقرية «الكرم» التابعة لمركز أبو قرقاص جنوب المنيا، نتيجة أعمال عنف بين مجموعة من المسلمين والأقباط، بسبب ما تردد عن إقامة نجلها علاقة غير شرعية مع مسلمة؛ مخاطبةً إياها في مطلع المكالمة بنبرة حزن شديدة: «حقك على راسنا كلنا ومعلش، اللي حصلك مأثر فينا، أرجوكي تقبلي اعتذار كل مصري عايز يوصل لحضرتك ويبوس راسك ويقولك حقك علينا».

فيما قالت السيدة عن مرتكبي الواقعة؛ «منهم لله، أنا شكياهم لربنا بس»، راويةً أحداث الواقعة: «دخلوا علينا البيت، يوم الجمعة بين المغرب والعشاء، مسكوا زوجي ضربوه، قمت أنا عليت صوتي يمكن حد يغيثنا، جرجروني في الشارع وضربوني وشتموني، وقلعوني هدومي وخلوني زي أمي ما ولدتني، عروني خالص، ولا حد قدّر يقربلي أو يحميني بسبب الأسلحة اللي كانت معاهم، كانوا يضربوني ويموتوني بس مكنوش يعروني وخلوا الناس كلها تتفرج عليّا».

أضافت: «أنا قدّمت فيهم بلاغ يوم الخميس، ودخلت للمأمور قولتله إنهم هيولعوا في بيوت المسيحيين في الكرم، وأنا جايه أديكم خبر عشان تحموا الناس، رد عليّا وقالي روحي اكتبي البلاغ وهاتيه، روحت كتبت البلاغ ورجعتله وجبت نمرة المحضر معايا، والله ما في أي حد من الأمن جيه ولا قرّب للمنطقة، ونمت عند ابني في اليوم ده ورجعت لقيتهم منفضين البيت من كل حاجة، الشرطة ولا حتى بعتت لنا غفير، يمكن لو كانوا بعتولنا غفير كان حمانا شوية، ولا فكروا فينا أبدًا، وبعد الواقعة روحنا مركز الشرطة تاني قالولنا إنتوا جايين تعملوا فتنة، روحوا روّحوا وطردوني من المركز».

وعن البيان الذي أصدره الرئيس عبد الفتاح السيسي، حول الواقعة، قالت: «ربنا ينصره، إحنا انتخبناه ووقفنا وراه وإديناه صوتنا عشان يحمينا، يحمينا ربنا في الأول وهو سندنا برضو».