شن الإعلامى سيف زاهر هجوماً نارياً على حسام عاشور، كابتن الأهلى السابق، مؤكداً أنه خرج من الباب الصغير وباع تاريخه مقابل الفلوس، وقال سيف زاهر فى برنامجه وان تو عبر إذاعة أون سبورت، "كفاية يا عاشور لعب بالورق، خرجت من الباب الصغير وخسرت كل حاجة، لو عايز نصيحة يا تقول حاجة كويسة يا تسكت، ابعد عن الأهلى ومتتكلمش عن النادى تانى، رصيدك نفد يا عاشور، مش معمول عليك حملة زى ماقولت، ده شعور جمهور كبير حبك وكرهك بفضل تصرفاتك ".

وأضاف سيف زاهر، "لازم أعتذر لجمهور الأهلى العظيم لأنه كان صح فى أزمة حسام عاشور، كنت بخرج أدافع عنه وأقول للجمهور بلاش قسوة، وبشويش على الكابتن التاريخى، حتى الزمالك كان محترم فى الأزمة ورفض تسريبات عاشور أن القلعة البيضاء تفاوضه وقالوا مش عايزين مزايدة من اللاعب ".

وتابع سيف زاهر، "عاشور لاعب باع ناديه وتاريخه عشان الفلوس، تاريخه راح ورصيده راح، التاريخ يحسب بالالتزام وبالأخلاق وبحب الكيان، أنا أهلاوى بس بتكلم كإعلامى، الأهلى فوق رأس جميع محبيه بس واضح أن الفلوس هى الأساس، عاشور مقالش جملة واحدة صح فى كلامه، لست مقرباً من الخطيب حتى أدافع عنه ولكن برىء تماماً فى أزمة عاشور".

وأكد سيف زاهر أن "الخطيب ومجلس الأهلى عملوا لعاشور اللى متعملش فى تاريخ الأهلى، عماد متعب قد حسام عاشور 100 مرة وطلب من مجلس الأهلى مباراة اعتزال، الكابتن الخطيب قاله مش بنعمل مباريات بنشارك بس، ومع ذلك متعب لم يهن إدارة الأهلى ولم يتلفظ بلفظ واحد على كيان الأهلى ولا الخطيب، وكذلك حسام غالى لأنهم عارفين يعنى أيه أهلى ويعنى أيه الكيان".

وتابع سيف زاهر، "كلام عاشور وهجومه على الأهلى لن يؤثر "سنتى واحد" فى تاريخ القلعة الحمراء وجمهورها، لأن جمهور الأهلى كان على حق فى أزمة عاشور، ولو اللاعب عنده جرأة يخرج يتكلم ويقول الحقيقة ويقول إنه طلب من الخطيب 20 مليون جنيه حتى لو مش هيلعب، وطلب يستمر سنتين فى الأهلى وياخد الـ 20 مليون حتى لو مش هيلعب رغم أن بقاله سنة محطش رجله فى الملعب، إذن عاشور كان عايز يكمل بدون لعب عشان ياخد 20 مليون جنيه يعنى عشان الفلوس وبيقول دلوقتى أنا قادر العب وعندى عروض، فين العروض دى ياعاشور كان لازم تحترم تاريخك ولو عايز تكمل تلعب فى أى نادى تانى حقك بس بدون ماتغلط فى النادى اللى صنع نجوميتك وتاريخك وشهرك".

وأضاف سيف زاهر، "عاشور عارف أنه مش هيلعب كورة تانى وعايز الأهلى يكافئه بـ20 مليون جنيه، وخارج يقول أنا طول عمرى ساكت لأ أنت مش ساكت أنت عملت ملايين وتاريخ بسبب الاهلى، فى ناس عندها صبر وولاء وانتماء ولم تتجاوز مخدتش ربع اللى انت خدته، كان عندك 10 % بعد موقفك الاخير وبكلامك الاخير فقدتهم "

حسام عاشور الذى تراجع عن فكرة الاعتزال وقرر استكمال مشواره مع الساحرة المستديرة، يواجه حالة من الغضب الأهلاوى على صعيد الجماهير أو السوشيال ميديا أو الإدارة الحمراء بسبب تصرفاته الأخيرة التى لم يكن موفقاً فيها بنسبة كبيرة، ورغم أنه صاحب إنجازات كبيرة لا يختلف عليها أحد كما يشهد له الجميع بدمث الأخلاق إلا أن الفترة الماضية وهجومه المُتكرر على النادى ساهم فى تقليص شعبيته وسحب من رصيده لدى جماهير الفريق.

ومازال حسام عاشور قائد الأهلى يفاضل بين عروض محلية وبين الانضمام لأحد أندية الدورى السعودى خلال الأيام المقبلة، ورفض عاشور فكرة الانتقال للزمالك بعد تلقيه عرضاً من أحد وكلاء اللاعبين للعب للفريق الأبيض إلا أنه رفض الأمر للحفاظ على علاقته بجماهير الأهلى.

واعتمد مجلس إدارة النادى الأهلى قبل فترة ما جاء فى مذكرة لجنة التخطيط للكرة بإلغاء توصياتها السابقة بمنح العديد من الاستثناءات للاعب حسام عاشور بعد اعتزاله، والتمنيات فقط له بكل التوفيق فى خطوته المقبلة، وذلك بعد هجومه على النادى مؤخراً.