كريم جابر

قالت الصيدلانية مارينا ماجد المتعافية مؤخراً من فيروس كورونا أن المعنويات المرتفعة للمريض عامل هام للغاية للشفاء، مشيرة إلى أنها تعافت من الفيروس اللعين من 3 أيام.

وأضافت الطبيبة بمستشفى الدمرداش لـ زهرة التحرير أنها مكثت في مستشفى العزل لـ 9 أيام، ووجدت طاقة سلبية مُنتشرة على مواقع التواصل الإجتماعي، لذلك قررت دعم كافة المرضى بنشر الطاقة الإيجابية حتى تمام شفائهم.

وعن كيفية إصابتها بكورونا أشارت إلى أنها تعمل بعيادة الكُلى وتخالط مرضى، مؤكدة أنها ستعود لعملها بالمستشفى مرة أخرى عقب 14 يوماً، مُتمنية القضاء على فيروس كورونا في أقرب وقت.

وطالبت المرضى بالتحلي بالإرادة القوية من أجل هزيمة هذا العدو الغير مرئي.

ووصفت الأطباء والطبيبات وكافة العاملين بالقطاع الطبي بالأبطال، قائلة: «الجميع يعلم ويقدر ما تقومون به من تضحيات».

وتقدم الدكتورة مارينا هذه الروشتة للتعامل مع الفيروس:

نتيجة لاتصال ناس كتيرة ، قررت اكتب البوست ده يمكن يفيد :
– انا اتعزلت فى مستشفى تبع الدمرداش و للاسف مفيهاش اماكن..
– الفيروس شديد لكن مجرد العزل و انك تاكل كويس و نفسيتك حلوة هتخف بسرعة..
– اعراض الفيروس مختلفة من شخص لشخص ، انا حالى سخونة و ضيق تنفس ، غيرى جسمه مكسر ، غيرى كحة شديدة ، الاعراض مش واحدة..
– العرض الوحيد الاكيد للفيروس اللى حتى الان بييجى لاغلب الناس المصابة هو فقدان حاسة التذوق و الشم و بيستمر شوية حتى مع سلبية المسحات..
– لو شاكك انك مصاب ، متقعدش قلقان و تخوف اهلك ، انزل فورا أعمل صورة دم كاملة و اشعة مقطعية على الصدر..
– لو اثبت اشتباهك او اصابتك ، العزل المنزلى احسن بكتير لاغلب الحالات معادا لو حالة الاكسجين بتاعها اقل من ٩٢.. كدة هنحتاج ندور على مستشفى و ممكن منلاقيش..
– لو فى ضيق تنفس ، حاول توفر اسطوانة أكسجين و جهاز Nebulizer و جهاز oximeter ، جبناهم من محلات فى العباسية خوفا اهلى يتعبوا بعد الشر فى يوم من الايام
– لو مصاب ، اعزل نفسك فى اوضة لوحدك فى البيت ، غير ملاية اوضتك يوميا ، اهتم باكلك بروتين و خضار ، اشرب سوايل كتيرة جدا ، مشروبات سخنة و ليمون ، اصحى بدرى اقف جنب الشباك و شم هوا نقى ، اعمل stretching بسيط..
– الادوية المهمة : زيثروماكس ٥٠٠ مجم كل ٢٤ ساعة ، دوا للسيولة ، فيتامين C and D3..
– فى اقاويل كتيرة على التاميفلو و الكلوروكين ، ليهم اضرار فى الاستخدام ، ياريت منجريش نشتريهم غير للضرورة علشان مريض الروماتيزم بيستخدم الكلوروكين دايما حرام ميلاقهوش..
– نفسيتكم اهم حاجة فى علاجكم ، اضحكوا دايما ، خلوة مع ربنا ، هتعدى انشالله
– عيلة اى شخص مصاب اعملوا زى عيلتى ، افتخروا به ، افرحوا لوجوده ، اخدموه ، قووه ، هيخف بسرعة بس اتعاملوا على بعد متر ، متدخلوش اوضته غير للضرورة و بكمامة..
– طلب اخير ، متنزلوش المستشفيات الا للضرورة ، خلونا نحتفظ بالاطباء اللى عندنا علشان يقدروا يعالجوا الحالات المحتاجة..