ناجي أنس

بحبِك ياللى مفيش ليكى بديل
يا أكتر واحده بتعرف تشيل
ياام القلب طيب
مفيش ليكى مثيل
يتحمل أى حمل
وان كان حتى تقيل
عمرك ماجرحتى
ولا رفستيلى طلب
ولا رميتى حملك
ولا يوم اتقلب
انا بهيم بحبك
وباشوف بيه العجب
وابرطع فى الدنيا
ولا يتعبنى تعب
ياسلام لما اشوفك
واتمرمغ فى رقتك
لما تهشى وتمشى
تنوّر سكتك
روحى تجرى منى
م الفرحه بخطوتك
إتغندرى يا ام الحوافر
حلوه متدلعه
م الفرحه بابقى طاير
وانتى فى البردعه
لما منك بقرّب الدنيا ممتعه
يامكربجه قلبى
إنتى ليا حصانه
برسم شفايفك بالخيال
دى حلوه مليانه
ولا اجمل من جمالك
كلك خفه ورزانه
أما بقرا أفكارك
بافرح واقول يانا
يام الخفه فى دلالك
أقول إيه عليكى
يا أوسم م الوسامه
كلك جمال وشيك
انا أول ما شفتك
قلبى انسلب ليك
إتعلق فى حبالك
لما شاف عنيك
إنتى عمرى وسعادتى
ولايوم جيتى عصايتى
ملجمه كيانى
وسالبه منى إرادتى
ماشى فى ركابك مانتى
لقلبى خلاص خطفتى
شدانى ومسلسلانى
ولكل همومى شلتى
لو كانت الفرصه سانحه
إبقى إدينى منحه
خلينى حبه أشوفك
والبسى حتى طرحه
لو خايفه يبان كسوفك
فرحينى فرحه
لما تدينى فرصه
أقابلك وانتى شاطحه
ياللى مهرك غالى
مفيش زيك مفيش
لما اشوفك بتاكلى
بمزاج باكية حشيش
واما جى احش لك
تاكليه ويا الدشيش
وعشان مانتى غاليه
حبك ما بينتهيش
ياللى خدودك باشوفها
ورد أحمر مقطّف
لما تنزل رقبتك
تتدلع جوه مقطف
باقول انا حق …. بالحق
مش بنافق والطّف
أصل الطيبه فى قلبك
أبيض م التلج وانضف
اتدلعى كمان
وانتى سارحه ولا يهمك
إرفعى راسك لفوق
ولا تدلدلى ودنك
افتحى بقك براحتك
أعرف منه سنك
ده مهما يمر الزمن
حافضل على طولً احبك
ماهو الزمن دوّار
والدنيا ماشيه برضه
خلانى احب فى حمار
واتغزل فيه لوحده
واتمنى اعيش معاه
واقضى العمر عنده
وابعد عنه الجبان
شيطان الله يهده
مالحب فى الزمن ده
بقى له معانى عجيبه
والكلمه صبحت معانده
بقت ياناس غريبه
وزمان كان اللى ناجى
يقول .. أنا بانجو
من مصيبه
والنهارده بانجو
يعنى .. ملحوس
مرووش وشربه
دمار وخيبه .