كتب الممثل أحمد حلمي توضيحا عبر صفحته الرسمية على فيسبوك مؤكدا فيه أنه يكن كل احترام للفنان محمد رمضان واصفا إياه بالزميل العزيز.

تجدر الإشارة إلى أن توضيح حلمي جاء بعد بوست كتبه محمد رمضان اليوم هاجم فيه حلمي الذي كانت قد كتب بوستا قبل يومين فهمه الجميع أنه انتقاد لرمضان بعد أن نشر صوره مع سيارتيه الفارهتين.

وقال حلمي في بوست اليوم: "أعزائي الكرام .. توضيح بسيط وسريع بخصوص ما حدث بعد نشر الصوره بتاعتي وأنا راكب العربيه الميني القديمة اللي كانت معايا في فيلم ظرف طارق.. و اللي الناس فهمت إنها بغرض إني بوجه رساله لزميلي الفنان "محمد رمضان" وهذا ما أحزني كثيرا."

وأضاف:"يا جماعه أنا لو عايز أوجه رسالة لأي حد أعرفه كويس أو حتى معرفوش مش هاعمل كده على مواقع التواصل الاجتماعي .. لأني عمري ما عملت كده أبدا لأني ببساطة ممكن أبعتله رساله علي موبيله أو هاكلمه في التليفون" .

واستطرد:" أما الكلام اللي كان مكتوب تحت الصوره اللي كتير من الناس معرفش إزااااااااي بجد فسروه بالطريقة دي مع إنه فعلا ما يخصش حد خالص غير واحد صاحبي هو الوحيد اللي هايفهمه لأني قايله بسبب موقف طريف حصل معانا و ليه علاقة بالعربية الميني .. علشان كده نهيت الكلام المكتوب بـ " ده كلام في سرك ….. ششش"

واختتم حلمي قائلا:" حقيقي حزنت بسبب حالة الخناق الرهيبة اللي حصلت اللي مالهاش أي أساس من الصحة.. ياجماعه إنتوا جمهورنا اللي بنستقوي بيكوا و إحنا من غيركوا والله مالناش أي لازمة.. انتوا سر قوتنا فأرجو أن تقوونا ببعض .. زميلي العزيز محمد رمضان… ربنا معاك و يوفقك دايما و تحقق كل اللي نفسك فيه في حياتك الفنية".